விஜய் டிவியில் ஒளிபரப்பாகி வரும் பிக்பாஸ் நிகழ்ச்சியின் முதல் பாகம் கடந்த 2017-ம் ஆண்டு தொடங்கப்பட்டது. அப்போதிலிருந்து ஆண்டுதோறும் நடைபெற்று வரும் இந்த பிக்பாஸ் நிகழ்ச்சியின் 6 சீசன்களையும் நடிகர் கமல்ஹாசனே தொகுத்து வழங்கி வருகிறார். நூறு நாட்கள் நடக்கும் இந்த போட்டியில் இறுதிவரை பிக்பாஸ் வீட்டிற்குள் இருப்பவர்களில் ஒருவர் டைட்டில் வின்னராக அறிவிக்கப்பட்டு வருகிறார்.
கடந்த ஆண்டு பிக்பாஸ் அல்டிமேட் என்ற நிகழ்ச்சியும் ஒளிப்பரப்பானது. இதை ஆரம்பத்தில் கமல்ஹாசன் தொகுத்து வழங்கிய நிலையில், அதன் பிறகு நடிகர் சிம்பு தொகுத்து வழங்கினார்.
பிக்பாஸ் நிகழ்ச்சியானது ஆண்டுதோறும் ஜூன் மாதம் தொடங்கி வந்தது. ஆனால் கொரோனா காலகட்டத்திற்கு பிறகு அக்டோபரில் தொடங்கி ஜனவரியில் முடித்தார்கள்.
இந்த நிலையில் அடுத்து தொடங்கவிருக்கும் பிக்பாஸ் சீசன்-7 நிகழ்ச்சியை இந்த ஆண்டு ஜூன் மாதத்திலேயே தொடங்க இருப்பதாக தகவல் வெளியாகி இருக்கிறது. கடந்த ஆறாவது சீசன் இறுதி நாளன்று விடைபெறும்போது மீண்டும் சந்திப்போம் என்று சொல்லிவிட்டு விடைபெற்றார் நடிகர் கமல்ஹாசன்.
அதனால் பிக்பாஸ் சீசன் 7-வது நிகழ்ச்சியையும் அவரே தொகுத்து வழங்குவார் என்று தெரிகிறது.
