மலையாள நடிகை மாளவிகா மோகனன் தமிழில் பேட்ட, மாஸ்டர், மாறன் போன்ற படங்களில் நடித்துள்ளார். தற்போது மலையாளத்தில் ‘கிறிஸ்டி‘ என்ற படத்தில் நடித்துள்ளார். சமீபத்தில் இதன் டிரைலர் வெளியாகி நல்ல வரவேற்பை பெற்றது. இந்நிலையில் இவருக்கும், நடிகை நயன்தாராவுக்கும் இடையே ஒரு மறைமுக பனிப்போர் நடந்து வருகிறது. சமீபத்தில் ஒரு பேட்டியின் போது, ‘ ஒரு படத்தில் மருத்துவமனை காட்சியில் நடித்த போது முழு மேக்கப் உடன் தலை முடிகள் கூட கலையாமல் நடிகை ஒருவர் நடித்து இருந்தார்‘ என நயன்தாராவை பெயர் சொல்லாமல் மறைமுகமாக விமர்சித்திருந்தார்.
இதற்கு பதிலளிக்கும் விதமாக ஒரு பேட்டியில், ‘‘ரியலிஸ்டிக் படங்களுக்கும், கமர்சியல் படங்களுக்கும் வித்தியாசம் இருக்கிறது. நான் நடிப்பது கமர்சியல் படம் என்பதால் தான் அப்படி நடித்தேன்“ என நயன்தாரா அதிரடியாக பதிலடி கொடுத்திருந்தார். இந்த நிலையில் மீண்டும் தற்போது ஒரு பேட்டியில் ‘லேடி சூப்பர் ஸ்டார்‘ பற்றிய கேள்விக்கு பதிலளித்துள்ள மாளவிகா மோகனன், “ உண்மையாகவே எனக்கு அந்த வார்த்தையின் மீது நம்பிக்கையில்லை. பெண்களை சூப்பர் ஸ்டார் என அழைக்கலாம். ஆனால், லேடி சூப்பர் ஸ்டார் என்பதன் அவசியம் என்ன. தீபிகா படுகோன், ஆலியா பட், கத்ரீனா ஆகியோர் சூப்பர் ஸ்டார்கள் தான். அதுமாதிரி அழைத்தால் போதுமே“ என்றார்.
மாளவிகா மோகனின் இந்த பேட்டி வைரலானது. நயன்தாராவை மீண்டும் மாளவிகா மோகனன் சீண்டுகிறார் என அவருடைய ரசிகர்கள் மாளவிகா மோகனனுக்கு எதிராக கருத்தை பதிவிட்டு வருகின்றனர். இந்நிலையில் இதுபற்றி ஒரு பதிவு போட்டுள்ளார் மாளவிகா. அதில், “நான் எந்த ஒரு நடிகையையும் குறிப்பிட்டு அப்படி கூறவில்லை. பெண் நடிகைகள் பற்றி எனது கருத்தை தெரிவித்தேன். நயன்தாராவை மிகவும் நான் மதிக்கிறேன். மூத்த நடிகையாக அவரது திரையுலக பயணத்தை பார்த்து வியக்கிறேன். கொஞ்சம் மக்கள் அமைதியாக இருங்கள்“ என குறிப்பிட்டுள்ளார்.
