விஜய் நடித்த ‘வாரிசு‘ திரைப்படம் சமீபத்தில் திரையரங்குகளில் வெளியாகி ஓடிக்கொண்டிருக்கிறது. இந்த படம் திரையிடப்பட்ட பல தியேட்டர்களில் விஜய் ரசிகர்களை கவரும் விதமாக புதுப்புது யுக்திகளை பயன்படுத்தி வருகின்றனர் தியேட்டர் நிர்வாகத்தினர். அந்த வகையில் தமிழகத்தில் உள்ள ஒரு திரையரங்கம் ஒரு புதிய யுக்தியை கையாண்டு விஜய் ரசிகர்களை குஷிப்படுத்தியதுடன் விஜய் தரப்பினருக்கு அதிர்ச்சியையும் அளித்துள்ளது. விஜய் அடுத்ததாக லோகேஷ் கனகராஜ் இயக்கத்தில் நடிக்க உள்ள அவரது 67-வது படம் தற்போது படப்பிடிப்புடன் துவங்கியுள்ளது.
இப்படத்தில் கவுதம் மேனன், மன்சூர் அலிகான், சஞ்சய் தத், அர்ஜுன் தாஸ் உள்ளிட்ட ஒரு சிலர் நடிப்பதாக ஏற்கனவே தகவல் வெளியாகி உள்ள நிலையில் படத்தின் புகைப்படமோ போஸ்டர்களோ எதுவும் இதுவரை வெளியிடப்படவில்லை. ஆனால் ரசிகர் ஒருவர் இந்த படத்திற்காக டீசர் போன்று உருவாக்கிய வீடியோ ஒன்றை இந்த தியேட்டர் நிர்வாகம் படத்தின் இடைவேளையின் போது ஒளிபரப்பி விஜய் ரசிகர்களை உற்சாகப்படுத்தியுள்ளது. பார்ப்பதற்கு படத்தயாரிப்பு நிறுவனமே வெளியிட்டது போன்று தத்ரூபமாக உருவாக்கப்பட்டுள்ள அந்த வீடியோ தற்போது சோசியல் மீடியாவில் வைரலாக பரவி வருகிறது.
